Blog

غسل میں کلی کرنا یا ناک میں پانی ڈالنا بھول گیا تو کیا کرے؟

سوال : السلام علیکم ورحمتہ اللہ وبرکاتہ امید ہیکہ مفتی صاحب  بخیر ہونگے۔ ایک مسئلہ معلوم کرنا تھا کہ اگر کوئی شخص فرض غسل کرے، اور کلی کرنا ناک میں پانی ڈالنا بھول جائے، پھر کپڑے پہن لینے کے بعد یاد آنے پر کلی کرے اور ناک میں پانی ڈالے، تو کیا اسطرح سے فرض غسل ادا ہوجائے گا؟ یا اس کو سر نو غسل کرنا ہوگا؟

            المستفتی : مسعود اعجازی اورنگ آبادی

  ۞۞۞۞۞۞۞۞۞۞۞۞۞۞۞۞

جواب  باسم الملہم للصدق والصواب:

 وعليكم السلام ورحمۃ اللہ وبرکاتہ، خیریت دارم وخیریت خواہم۔ صورتِ مسئولہ میں غسل ہوجائے گا؛ کیوں کہ موالات یعنی اعضاء کو لگاتار دھونا صرف سنت ہے فرض نہیں ہے. چنانچہ بہشتی زیور میں لکھا ہے کہ اگر غسل کے بعد یاد آوے کہ فلانی جگہ سوکھی رہ گئی تھی تو پھر سے نہانا واجب نہیں؛ بلکہ جہاں سوکھا رہ گیا تھا اسی کو دھو لیوے، لیکن فقط ہاتھ پھیرنا کافی نہیں ہے؛ بلکہ تھوڑا سا پانی لے کر اس جگہ بہانا چاہئیے، اور اگر کلی کرنا بھول گئی (گیا) ہو تو اب کلی کرلے، اور اگر ناک میں پانی نہ ڈالا ہو تو اب ڈال لے؛ غرضیکہ جو چیز رہ گئی ہو اب اس کو کرلے، نئے سرے سے غسل کی ضرورت نہیں ہے۔ (بہشتی زیور: 1/57)